ابو بس نسيت الرقم السري حق الاي كلاود والايفون او الايباد مقفل وماقدر افتحه, ممكن تساعدني؟ في الحقيقة ابو بس ماقدر يساعد نفسه عشان يساعدك. في امريكا او اوربا لما يتقفل الا يكلاود بسبب ان نسيت رقمك السري بكل بساطة تاخذ الفاتورة او مايثبت ان هذا جهازك وتروح لاقرب فرع لمتاجر أبل ويفتحون لك الجهاز, طبعن بعد ماتجيب مايثبت ان الايفون او الايباد ملكك.

لكن هنا مثلن في السعودية او غيرها اذا نسيت الرقم السري حق الاي كلاود وتقفل عليك الايفون بتاكلها وماتقدر تفتحه لا ابو بس ولا حتى ابل تقدر تسوي لك شي. المفروض ان الضمان هو الي يفتحه لك, يعني مثلن لو كان ضمان ايفونك STC تروح لهم وتعطيهم مايثبت ان الجهاز لك ويفتحونه بما انهم وكيل لشركة ابل في السعودية وايضن الضمان عليهم. انا ماجربت بصراحة ولا ادري عنهم اذا كانو يفتحونه او لا هم او غيرهم.

طيب يابو بس الحين الاي كلاود مقفل على ايفوني او ايبادي وش اسوي عشان افتحه؟ طيب الطريقة الوحيدة هي عن طريق موقعchronicunlocks لو كنت في خارج السعودية تقدر مباشرة تعبي النموذج الي في الموقع ترسل لهم رقم IMEI حق الايفون او الايباد, وهذا تقدر تعرفه اذا فتحت جهازك اول ماتشغله ويطلع لك Hello بتحصل ايقونة علامة تعجب تحت يمين ! اضغط عليها وهو ثاني رقم. وتكمل الباقي نوع جهازك وعمومن الطريقة موضحة في الموقع نفسه الخطوات كاملة. وبعدين بيطلب منك التسديد عن طريق الباي بال او الفيزة مانب متاكد. وبس انتظر لين يردون عليك ويفتح جهازك.

طيب لوكنت في السعودية, هناك وكلاء لهذي الشركة chronicunlocks الي تفتح الاي كلاود كما هو مذكور في صفحة موقعهم الرسمية, في الرياض والقصيم محل اسمه متجر العليان هنا حسابهم حق تويتر وموجود ارقام محلاتهم على البايو حق الصفحة تقدر تتصل عليهم وتاخذ معلومات اكثر اذا تبي. او محل الكفي في جدة. او المهندس للاتصالات في الطايف موجودة ارقامهم في اسفل الصفحة بموقع chronicunlocks تقدر تتصل عليهم وتعرف اكثر منهم.

طيب فيه مشكلتين في هذي الخدمة حقت فتح الاي كلاود, اول شي انه تقريبن غالي يعني سعر فتح الجهاز من قفل الاي كلاود بـ $149 يعني تقريبن 500 ريال سعودي. يمكن بعض الناس يقول انا ماعندي مشكلة اهم شي يفتحون جهازي.

المشكلة الثانية هي انك رايح تنتظر اقل شي شهر عشان يفتحون جهازك, حسب ماذكر بالموقع بالصفحة الانجليزية ان تنفيذ الطلب رايح يطول ويمكن يوصل ل 50-30 يوم, وتقدر تلغي الطلب وتسترجع فلوسك فقط بعد 25 يوم اذا لم يتم تنفيذه. وحتى المحلات الي هي وكيله لهم بالسعودية نفس الكلام, اتصلت على متجر العليان بالرياض وقال تنتظر شهر عشان يفتحون الجهاز لك والسعر 500 ريال.

هل فيه طريقة ثانية يابو بس؟

صدقني هذي هي الطريقة الوحيدة حتى الان.

نقطة اخيرة وبصراحة انا لا اسوق لهم ولاشي, متجر العليان هذا اذا تحب تشتري ايفون 6 او 6 بلس انا اشوف انه من افضل المحلات بالنسبة للاسعار وهي تقريبن نفس اسعار في أبل تقدر تعرف المزيد عن الاسعار عندهم في حسابهم على تويتر.

من فضلك شارك هذا الموضوع اذا اعجبك

الموضوع من طرف: امين محمد

محمد امين 24 سنة ،مدون جزائري مهووس بجديد تكنولوجيا المعلوميات ، مهتم بتطوير المواقع والتجارة الالكترونية يمكنك متابعته من خلال الفيسبوك . تويتر . جوجل بلس

ضع تعليقا أخي الكريم